Алматы әкімі Дархан Сатыбалды Катардың Power International Holding компаниясының өкілдерімен кездесу өткізді. Кездесу барысында тараптар демалыс пен ойын-сауық индустриясы, бөлшек сауда және цифрлық технология салаларында бірлескен инвестициялық жобаларды іске асыру мүмкіндіктерін талқылады,- деп хабарлайды Qazyr.kz
Power International Holding компаниясының Катарда, Мальдив аралдарында және өзге де елдерде кешенді жобаларды жүзеге асыруда халықаралық тәжірибесі бар. Тараптар Алматының әлеуеті мен қолайлы инвестициялық ахуалын ескере отырып, қалада бірлескен жобаларды іске қосудың маңыздылығын атап өтті.
Дархан Сатыбалды Алматы қаласы еліміздің ішкі жалпы өнімінің төрттен бірін қамтамасыз ететінін және халықаралық бастамаларға ашық екенін атап өтті. Сондай-ақ, Қазақстан мен Катар арасындағы екіжақты ынтымақтастық деңгейінің жоғары екенін және мегаполистің ауқымды инвестициялық жобаларды жүзеге асыруға дайын екенін жеткізді.
PIH өкілдері өз кезегінде нақты серіктестік бағыттарын пысықтауға дайын екенін білдіріп, Алматыны өңірдегі экономикалық өсімнің негізгі орталығы ретінде жоғары бағалады.
