Қаржы нарығын реттеу және дамыту агенттігі қазірде кредитті растау мерзімін ұзарту мәселесін қарастыруда. Бұл өзгеріс алаяқтық әрекеттерді азайту және лудоманияның алдын алу мақсатында енгізілуі мүмкін.
«Алаяқтар жиі несие алып, оны жылдам өз есепшотына аударады. Сонымен қатар, лудомандардың қаржылай қолжетімділігін шектеу қажет. Олар да көбінесе шұғыл ақшаға мұқтаж болады. Адамдар несиені тек қажеттілік туындаған кезде, асықпай, мұқият ойланып қабылдауы тиіс», – деп түсіндірді Бірінші кредиттік бюро директоры Руслан Омаров.
Қаржы ұйымдары бұл ұсынысқа қарсы болуы ықтимал, бірақ реттеуші органдар нарықтың дұрыс жұмыс істеуін қамтамасыз ету үшін осындай шаралар қабылдауға міндетті. Қазіргі уақытта өзгеріс енгізілетін уақыт пен механизмнің нақты шарттары әлі белгісіз.
