Алматы қаласында жастар арасындағы есірткіге тәуелділіктің алдын алуға бағытталған «НаркоСтоп» жобасы белсенді түрде жүзеге асырылып келеді. Жоба нашақорлықтың таралуына тосқауыл қою, жастарды зиянды әдеттерден сақтау және қоғамда салауатты өмір салтын қалыптастыруды көздейді. Бұл бағыттағы жұмыстар қала әкімдігі, құқық қорғау органдары, үкіметтік емес ұйымдар мен еріктілердің бірлескен іс-қимылы арқылы жүйелі түрде жүргізіліп отыр деп хабарлайды Qazyr.kz
Алматы қаласында нашақорлықпен күреске арналған кешенді жоспар аясында төрт мамандандырылған орталық үздіксіз жұмыс істейді. Бұл орталықтарда жастарға психологиялық, әлеуметтік және медициналық көмек көрсетіледі. Сондай-ақ, тәуелділікке бейім адамдармен жеке және топтық кеңес беру жұмыстары ұйымдастырылады. Игі іске 3 мыңнан астам ерікті тартылып, олар ақпараттық-түсіндіру жұмыстарынан бастап, нақты алдын алу шараларына дейін белсенді қатысуда.
2025 жылдың басынан бері «НаркоСтоп» жобасы аясында 180-нен астам профилактикалық іс-шара өткізілді. Атап айтқанда, мектептер мен колледждерде, жоғары оқу орындарында дәрістер, тренингтер, кездесулер мен ашық пікірталастар ұйымдастырылды. Жастарға есірткінің денсаулыққа, болашаққа тигізер зияны нақты деректер арқылы түсіндіріліп келеді. Сонымен қатар, қала көшелерінде тыйым салынған заттарды жарнамалайтын 18 мыңнан аса трафарет пен граффити боялып өшірілді. Бұл – есірткіні жасырын насихаттаудың кең таралған тәсілдерінің бірімен жүйелі күрестің айқын көрінісі.
Алдын алу бағытында 35-тен астам әлеуметтік бейнеролик әзірленіп, олар әлеуметтік желілерде, LED-экрандарда, қоғамдық көліктерде және халық көп шоғырланатын орындарда көрсетілуде. Бұл бейнероликтер жастардың санасына әсер ететін заманауи форматта дайындалып, зиянды әдеттерден бойды аулақ салуға үндейді.
2024 жылдан бастап «НаркоСтоп» жобасы аясында кибереріктілік бағыты іске қосылды. Бұл бағытта арнайы дайындықтан өткен еріктілер интернет кеңістігінде тыйым салынған заттарды насихаттайтын сайттар мен әлеуметтік желідегі парақшаларды анықтап, құқық қорғау органдарына хабарлайды. Нәтижесінде 197 интернет-ресурс бұғатталып, зертханалар, есірткі сатушылар мен үгіттеушілер туралы мәліметтер тиісті мекемелерге жолданған. Бұл – заман талабына сай, цифрлық кеңістіктегі қауіптің алдын алуға бағытталған маңызды қадам.
Айта кетейік, Алматы қаласында 14 пен 35 жас аралығында 712,3 мың жас тұрады. Бұл – қала халқының 32 пайызы. Қаладағы 35 жоғары оқу орнында және 88 колледжде 296,5 мың студент білім алады, олардың 167 мыңы өзге өңірлерден келген жастар. Сондықтан да Алматы – жастар шоғырланған мегаполис ретінде тәуекел топтарының алдын алу бойынша кешенді саясатты талап етеді.
Жастар саласында атқарылған жүйелі жұмыстар өз нәтижесін беріп келеді. NEET санатындағы жастар үлесі 6,4 пайыздан 5,8 пайызға төмендеді. Ал 2025 жылдың екінші тоқсанында жастар арасындағы жұмыссыздық деңгейі 4,1 пайызға дейін азайды. Бұл көрсеткіштер Алматы қаласын 2025 жылға дейін дамыту бағдарламасы мен 2030 жылға арналған орта мерзімді жоспарларды іске асырудың, сондай-ақ жастарды жұмыспен қамту, кәсіпкерлікке баулу және әлеуметтік қолдау тетіктерін жетілдірудің тиімділігін көрсетеді.
«НаркоСтоп» жобасы тек есірткімен күрес шарасы ғана емес, ол – жастардың белсенді азаматтық ұстанымын қалыптастыратын, қоғамдағы жауапкершілікті арттыратын маңызды әлеуметтік платформа. Жоба аясында еріктілер тек алдын алу шараларымен шектелмей, қиын жағдайға тап болған жастарға бағыт-бағдар беріп, жаңа өмір бастауға мүмкіндік туғызуда. Сондықтан да бұл бастама алдағы уақытта да өзектілігін жоғалтпай, кең ауқымда дамитыны сөзсіз.
