Қазақстанның Төтенше жағдайлар министрлігі 30 жылдық даму жолында өз құрылымын нығайтып, кәсіби дәстүрін қалыптастырды. Бұл тарих – күн сайын өзгелердің өмірін құтқару үшін өз өмірін қатерге тігетін батыл қызметкерлердің ерлігімен тікелей байланысты. Бүгінде жас буын құтқарушылары осы дәстүрді жалғастырып, адал қызметтің айқын үлгісін көрсетуде.
Солардың бірі – Қарағанды облысының ТЖД-не қарасты №1 мамандандырылған өрт сөндіру бөлімінің аға өрт сөндіруші-құтқарушысы Думан Исабаев. Ол 2016 жылдан бері құтқару қызметінде еңбек етіп келеді. Өз ісіне адалдығы, кәсіби шеберлігі және шешім қабылдаудағы батылдығымен ерекшеленеді. Жылдар бойы көптеген өртті сөндіруге және апаттық жағдайларды жоюға қатысқан.
«Әр шақырту – бір өмірді аман алып қалу мүмкіндігі. Біз әрдайым дайын болуымыз керек, өйткені адамдардың тағдыры біздің қолымызда», – дейді ол.
Тағы бір жас құтқарушы – Орал қаласының №1 мамандандырылған өрт сөндіру бөлімінің аға өрт сөндіруші-құтқарушысы Қуаныш Тлешов. 2015 жылдан бері қызмет атқарып жүрген ол табандылығымен және батылдығымен танылды. Сонымен қатар, Қуаныш өзінің шығармашылығымен ерекшеленеді – ол фото және бейнематериалдар арқылы құтқарушылардың жанқиярлық еңбегін көрсетеді.
«Мен үшін құтқарушы болу – тек мамандық емес, бұл жүректен шыққан шақыру. Фото мен видео арқылы әрбір құтқару сәтінің сезімін, қорқынышын, үмітін және жауапкершілігін жеткізгім келеді», – дейді ол.
Думан Исабаев пен Қуаныш Тлешов – жас буын құтқарушыларының жарқын өкілдері. Олар өз қызметінде кәсібилікпен қатар, жүрек жылуын, жан қиярлықты, адам өміріне деген құрметті қоса алып жүр. Бұл – ТЖМ дәстүрінің мәңгілік жалғасы, азаматтардың тыныштығы мен қауіпсіздігінің кепілі.
