Алматыда қала әкімінің орынбасары Абзал Нүкенов «Талдау мектебі. Алматы» жобасының қатысушыларымен кездесіп, жастардың құндылық бағдары мен сараптамалық мәдениетті дамыту мәселесін талқылады. Ашық диалогта жауапкершілік, үнемшілдік, заңға құрмет және дерекке негізделген шешім қабылдау қағидаттары сөз болды, – деп жазады Qazyr.kz.
Narxoz Business School алаңында өткен кездесуге жоба түлектері, ғалымдар, жоғары оқу орындарының, бизнес пен қоғамдық ұйымдардың өкілдері қатысты. Қатысушылар жаңа буын көшбасшысының бейнесі мен мемлекеттік шешім қабылдаудағы талдаудың рөлін саралады. Жастарды қоғамдық өзгерістің сырттай бақылаушысы емес, белсенді авторы ету қажеттігі айтылды.
Абзал Нүкенов мемлекеттің табысы экономикалық көрсеткішпен ғана өлшенбейтінін атап өтті. Оның пікірінше, елдің орнықты дамуы адами капиталдың сапасына, білім деңгейіне және азаматтардың жауапкершілігіне тікелей байланысты. Сондықтан жастардың кәсіби білімі қоғамдық мүддеге қызмет ететін құндылықтармен сабақтасуға тиіс.
Қала әкімінің орынбасары «Талдау мектебі. Алматы» жобасын қарапайым білім беру бағдарламасынан ауқымды алаң деп бағалады. Жоба дерекке сүйеніп шешім қабылдау мәдениетін қалыптастырып, кәсіби талдамалық қауымдастықты дамытуға бағытталған. Қатысушылар Алматының өзекті мәселелеріне қатысты нақты әрі қолданбалы ұсыныстар әзірлейді.
Кездесуде Президент айқындаған «Адал азамат», «Таза Қазақстан» және «Заң мен тәртіп» қағидаттарына ерекше назар аударылды. Абзал Нүкеновтің айтуынша, аталған құндылықтар қаланың жастар саясатының негізгі өзегіне айналып келеді. Олар «Жасыл ел», «Эко-рейнджерлер», «Azamat», «НаркоСТОП», өңірлік ғылыми гранттар және «Жастардың қатысу бюджеті» жобалары арқылы жүзеге асырылып жатыр.
Science Hub эдьюкейторы Гүлдана Мәмбетова «Адал азамат» тұжырымдамасы күнделікті өмір мәдениетіне айналуы қажет екенін айтты. Оның ойынша, адалдық волонтерлік, зерттеу, білім алу және жеке жауапкершілік арқылы қалыптасады. Әділетті қоғам ең алдымен мәдениетті, білімді және жауапты азаматтан басталады.
Әл-Фараби атындағы Қазақ ұлттық университетінің Құқық үстемдігі және жасанды интеллект орталығының директоры Дана Байтуқаева заң мен тәртіпті нығайтуда талдаудың маңызына тоқталды. Оның айтуынша, заманауи басқару дерексіз болжамға емес, нақты ақпарат пен дәлелді шешімге сүйенуге тиіс. Технология проблеманы шешумен шектелмей, оның алдын алуға да қызмет етуі қажет.
IT-кәсіпкер Айболат Құлатай цифрлық дәуірдегі жастардың құндылық бағдарын талдады. Оның пікірінше, жоғары оқу орындары еңбек нарығына білікті маман даярлаумен ғана шектелмеуі керек. Білім беру жүйесі қоғам алдындағы жауапкершілігін түсінетін, технологияны адам игілігіне жұмсайтын азамат тәрбиелеуге тиіс.
Қатысушылар ресурстарға ұқыпты қарау, үнемшілдік мәдениетін орнықтыру және ысырапшылдықты шектеу мәселесін де көтерді. Мұндай қағидаттар тұрмыстық әдетпен шектелмей, мемлекеттік басқару мен қоғамдық мінез-құлықтың өлшеміне айналуы қажет. Жауапты азамат табиғи, қаржылық және адами ресурстың қадірін түсінуге тиіс.
Кездесу қорытындысында «Талдау мектебі. Алматы» кәсіби білім мен қоғамдық жауапкершілікті ұштастыратын орта қалыптастырып келе жатқаны айтылды. Жоба әділеттілік, адалдық және елге қызмет ету қағидатын басшылыққа алатын жас сарапшыларды біріктіреді. Осындай мамандар болашақта Алматының тұрақты дамуына және мемлекеттің стратегиялық бағытына ықпал ететін шешімдер қабылдай алады.
